Ginbuyagyag ni Department of Justice (DOJ) Secretary Jesus Crispin ‘Boying’ Remulla nga may napaguwa na nga International Criminal Police Organization (Interpol) blue notice batok kay suspended Negros Oriental Rep. Arnolfo Teves Jr.
Bangud sa amo nga notice suno sa tiglikom, indi na matago ni Teves ang iya hulag kag kun diin ini nga pungsod nagatinir.
Ang blue notice amo ang naga-require sa member countries nga magtipon sang dugang nga impormasyon kaangot sa identity sang isa ka persona, lokasyon, kag mga aktibidad nga kaangot sa criminal investigation.
Ginpahayag pa ni Remulla nga kun magsulod si Teves sa isa ka lugar, gilayon nga gina-inform ang Pilipinas kag ini ang rason kun ngaa nahibaluan na sang national government nga yara sa Timor-Leste ang amo nga mamalidha.
Pahayag pa sang tiglikom, halin si Teves sa South Korea, nagpadulong sa Cambodia, nagbalik sa Korea, kag sunod nga nagpadulong sa Timor Leste.
Sa Timor-Leste ini nag-apply sang protection visa agud magpangayo sang asylum, apang gin-deny sang pungsod ang iya nga aplikasyon kag ginhatagan sang lima ka adlaw agud nga makabiya ini sa amo nga lugar.
Suno pa kay Remulla, magahingyo ang National Bureau of Investigation (NBI) sa Department of Foreign Affairs (DFA) nga ikanselar ang passport ni Teves agud nga mapilitan ini nga magbalik sa Pilipinas kun mapasaka na ang kaso nga murder batok sa iya.
Ginalantaw ni Remulla nga posible sa Byernes ukon sa Lunes i-pasaka ang sampaw-sampaw nga murder complaints batok kay Teves. ##
