Limitahan lamang sa biological females ang mahimo maka-intra sa women’s category sang Olympic sports umpisa sa 2028.
Gin-anunsyo ini sang International Olympic Committee (IOC) apang ginklaro nga ang eligibility ang dapat nga tumuron paagi sa “once-in-a-lifetime” sex test.
Tikang ini sang organisasyon agud nga malikawan nga mapa-compete sa amo nga kategorya ang transgender women kag ang may differences in sexual development (DSD) nga nakaagi sa male puberty.
Mangin epektibo ini nga polisa sa Los Angeles Olympics kag sa masunod nga mga edisyon sang Olympiada.
Suno kay IOC president Kirsty Coventry, ginbalay ini nga policy sa pagpanguna sang medical experts.
“At the Olympic Games even the smallest margins can be the difference between victory and defeat,” suno sa iya. “So it is absolutely clear that it would not be fair for biological males to compete in the female category. In addition, in some sports it would simply not be safe.”
May istrikto nga screening nga himuon agud nga ma-detect ang SRY gene – ang sex-determining region Y gene – nga parte sang Y chromosome kag rason sang pag-develop sang male characteristics.
“The IOC considers that SRY gene screening via saliva, cheek swab or blood sample is unintrusive compared to other possible methods,” suno sa president.
Ang mga atleta nga mag-negative sa SRY gene amo ang maka-satisfy sa eligibility criteria para sa kumpetisyon sa female category.
“Unless there is reason to believe that a negative reading is in error, this will be a once-in-a-lifetime test,” dugang sang IOC president.
Pananglitan naman nga indi makapasar sa test ang atleta, mahimo sila malakip sa iban nga classifications kun sa diin sila kuwalipikado.
Dugang sini: “For example, they are eligible for any male category, including in a designated male slot within any mixed category, and any open category, or in sports and events that do not classify athletes by sex.”
Antes sini nga anunsyo, matandaan nga madugay man nga tion nga wala nag-apply ang IOC sang universal rule sa transgender participation sa Olympics. Sang 2021, nagmandu pa ini sa international federations nga maghimo sang ila kaugalingon nga guidelines.
Sa Paris 2024 Olympics, madumduman nga nabukaran liwat ang kontrobersiya bangud sa duha ka boxers nga nag-compete sa female categories nga pareho man nga nagdaog sang gold medal sa ila weight classes. Antes sa Olympics, gin-ban sila sa world championships paagi sa desisyon sang ila tagsa ka international federation bangud sa resulta sang gender eligibility test.#
