Ginpasiguro sang Iloilo Police Provincial Office (IPPO) nga may koordinasyon kag kolaborasyon ini sa Iloilo Provincial Government para nga mapabaskog ang enforcement batok sa iligal nga quarrying operations sa probinsya.
Sa interview sang Bombo Radyo kay Police Lt. Colonel Rolando Araño, spokesperson sang IPPO, iya ginpahayag nga kun may request halin sa Provincial Government Environment and Natural Resources Office (PGENRO), naga-upod gid gilayon ang pwersa sang pulis kag ginasigurado nga masunod ang ila standard operating procedures.
Aktibo man ang monitoring sang pulis suno sa iya nga napakita man sa ila nga accomplishment reports.
May nauna na nga pahayag ang PGENRO nga may involvement ang mga pulitiko, negosyante, kag pila ka dalagku nga indibidwal sa uniformed services sa illegal quarying, apang nagpahayag si Araño nga indi sini unahan sang IPPO ang imbestigasyon sang amo nga opisina.
Sa latest report sang IPPO, may 21 dump trucks kag isa ka payloader nga nagkaladakpan sa malapit duha ka semana nga asud-asud nga operasyon sa padayon nga ginapabaskog nga kampanya kontra illegal quarry halin sang Abril 25 tubtub Mayo 6, 2026 sa nagkalain-lain nga banwa.
Nanguna sa operasyon ang Santa Barbara MPS nga may walo tanan ka mga nadakpan kag nagapangaduha naman ang Miagao MPS nga may apat ka mga nadakpan lakip ang isa ka pay loader.
May tatlo nga nadakpan sa San Miguel; duha sa Cabatuan; kag tag-isa naman sa Zarraga, Oton, New Lucena, Badiangan kag Tigbauan.
Lakip sa mga bayolasyon amo ang incompletely filled-out, misdeclared entry, tampered delivery receipt, open dated kag no hauling contract.
“Sa karun temporaryo pa nga impounded ang pipila pa ka mga nasambit nga mga truck sa tagsa ka mga Police Stations sa pagpangatubang sa paglapas sang Revised Revenue Code of Iloilo, SEC. 2H.35, Par.B-18 ukon Illegal Quarry,” suno sa IPPO press release.
Dugang sini: “Ang Iloilo Police Provincial Office sa idalum sang mabaskog kag dedikado nga liderato ni Police Colonel Bayani M Razalan, Provincial Director, ang padayon sa mabaskog nga kampanya kontra Illegal Quarry sa pagprotektar sang dunang manggad sang Probinsya.”#
