Ginapadayon sang Iloilo Police Provincial Office (IPPO) ang kampanya sini kaupod sa mga eskwelahan sa probinsya sang Iloilo agud nga malikawan ang mga insidente sang pagpang-bully kag makahimo sang kultura nga may pagtahod kag paghangop para sa mga kabataan.
Sa interview sang Bombo Radyo kay Police Lt. Colonel Arnel Solis, spokesperson sang IPPO, iya ginpahayag nga paagi sa Police Community Relations, nagapakig-angot sila sa mga buluthuan kag sa iban nga stakeholders agud nga mapasangkad ang ila nga mga tikang.
Naga-istorya man sila suno kay Solis sa Parents-Teachers Association ukon PTA.
Magluwas diri, nagapanghatag man ang mga pulis sang flyers agud nga ma-edukar sang dugang ang mga kabataan kaangot sa bullying kag ang epekto sini sa ila nga isigkatawo.
Matandaan nga sang tinalikdan nga bulan, kadungan sang pagsugod sang bag-o nga school year, may direktiba man ang Department of Education (DepEd) 6 sa tanan nga schools division superintendents sa Western Visayas nga siguruhon nga may makit-an nga mga pulis ukon law enforcers kag magpakig-angot man sa mga barangay tanod para sa mas hugot nga seguridad sang mga kabataan.
Liwat nga ginpanawagan ang mas hugot nga seguridad kasunod sang nagluntad nga shooting sa sulod mismo sang eskwelahan sa Tacloban kun sa diin duha ka Grade 9 students ang involved kag tatlo sa ila schoolmates ang nagkalamatay.#
