Nagaguwa sa reports nga nagpangtanum na ang Iran sang bomba sa Strait of Hormuz — ang alagyan sang daku nga suplay sang langis nga kinahanglan sang madamo nga mga pungsod.
Sandig sa impormasyon nga nakalab-ot naman kay United States President Donald Trump, indi pa malapad ang area kun sa diin ginpangbutang ang mga bomba.
“The mining is not extensive yet, with a few dozen having been laid in recent days, the sources said. But Iran still retains upward of 80% to 90% of its small boats and mine layers, one of the sources said, so its forces could feasibly lay hundreds of mines in the waterway,” sandig sa reports sang CNN.
Nahibaluan nga may kapasidad ang Islamic Revolutionary Guard Corps (IRGC) sang Iran nga mag-deploy sang “gauntlet” sang dispersed mine-laying craft, explosive-laden boats, kag shore-based missile batteries. Ang IRGC amo subong ang nagakontrol sang Strait of Hormuz.
Gilayon naman nga gin-address ni Trump ang isyu paagi sa iya post sa Truth Social. Nagpaandam ini nga dapat kakason na sang Tehran ang ginpangbutang sini nga bomba, bangud kun indi, maagyan nila ang military consequences nga wala pa nila na-eksperyensyahan.
“If for any reason mines were placed, and they are not removed forthwith, the Military consequences to Iran will be at a level never seen before,” kabahin sang post sang US president. Apang dugang niya, kun kuhaon sang Iran kun ano ang ila ginbutang, “it will be a giant step in the right direction.”
Kasunod sang amo nga post ni Trump, nag-post man si US Secretary of War Pete Hegseth sa X nga sunod sa direksyon sang presidente, gina-eliminate na sang US Central Command ang “inactive mine-laying vessels in the Strait of Hormuz—wiping them out with ruthless precision. We will not allow terrorists to hold the Strait of Hormuz hostage.”
Sunod naman nga nagkumpirma ang US Central Command nga ginpangguba nila ang pila ka Iranian naval ships — lakip na ang 16 minelayers — malapit sa Strait of Hormuz.
Ginakabig ang Strait of Hormuz nga isa sa most critical maritime chokepoints sa kalibutan kun sa diin 20–25% sang global oil consumption kag 20% sang liquefied natural gas (LNG) ang nagalabay kada adlaw. Nahamtang ini nga 33km-wide waterway sa tunga sang Iran kag Oman, kag amo ang primary exit para sa Gulf producers kaangay sang Saudi Arabia, Iraq, kag Qatar. #
