17 ka adlaw na lang, Paskuwa na!
Nakumpleto na bala ang imo Christmas decorations?
Kilala ang mga Pinoy kun pagahambalan ang pa-bongga-bongga kag palawig-lawig sang selebrasyon sang Paskuwa.
Apang may yara pa gid sang isa ka pamilya sa Germany nga world record holder gid bangud sa kadamuon sang ila Christmas trees nga lab-ot pati sa ila bathroom.
Ini amo ang pamilya nanday Thomas kag Susanne Jeromin sa Rinteln sa Lower Saxony sa amo nga pungsod sa Europa.
Hamakon mo nga 605 gid ka mga decorated plastic Christmas trees ang yara sa ila balay!
Gingamitan ini sang 120,000 Christmas baubles, 50,000 lights kag linibo ka Christmas figures.
Ginsuguran sang Hunyo ang ila pagdekorar kag lain-lain pa ang theme sa kada kahoy — may ara nga “Star Wars” kag may ara naman nga “The Simpsons” kag iban pa.
Suno sa mag-asawa, passion gid sang bana ang paghimo sini gani nga nadalahig pati ang bathroom… apang ang isahanon nga off-limits amo ang kuwarto sang ila bata nga babaye.
Ini na ang ika-anum nga tuig nga ginhatag sa ila ang world record sang most decorated Christmas trees sa isa lamang ka lugar. Ginhatag man ini sang Record Institute for Germany sa ila pamilya sang 2017 tubtub sang 2021 kag sang 2023.
