Nagapalareho ang pirma kag agi sa acknowledgement receipts sa confidential funds ni Vice President Sara Duterte.
Sandig ini sa report sang National Bureau of Investigation (NBI) matapos ang gin-conduct nga forensic examination sa mga specimen signatures.
Gin-share ang findings sa hearing sang House Justice Committee kahapon, Abril 14.
Suno kay NBI documents expert Carolyn Moldez-Pitoy, sandig sa examination sa original copies sa file sa Commission on Audit, natukiban nga may yara sang mga resibo nga pirmado sang isa lang ka tawo.
Ginsiling man sini nga kun lantawon ang agi sa pagsulat sang mga petsa sa acknowledgement receipts, nakit-an nga ginhimo man ini sang isa lang kag pareho man nga tawo.
Kaupod sa mga ginhalimbawa amo ang mga resibo nga nakapangalan kanday “Sheila Dado”, kag “Sally Rendon” nga suno sa eksperto may kapareho nga estilo sa pagsulat.
May iban pa gid nga grupo sang mga resibo nga nakapangalan kanday “Jason Bitangcol,” “Selsa Arojable,” “Samson Samuel,” kag “Sabel Salazar” nga may pareho nga mga istilo sang handwriting.
Kahapon sang ginpatigayon ang hearing sang justice panel nga naangot sa impeachment complaints batok sa vice president.#
