Ginpa-idalom sa lockdown ang isa ka ward sa Western Visayas Medical Center bangud sa pagpositibo sa Coronavirus Disease 2019 (COVID-19) sang 13 anyos nga solterito nga taga Badiangan, Iloilo.
Sa interview sang Bombo Radyo kay Dr. Felice Molina, pinuno sang Infection and Prevention Control Unit kag tagpamaba sang nasambit nga ospital, iya ginpahayag nga 44 ka mga indibidwal ang naka close contact sang solterito nga lunsay mga pasyente , bisita sang pasyente kag personnel man sang Western Visayas Medical Center.
Matandaan nga nahulog sa puno ang solterito kag gindala sa ospital kag sang Hulyo 6 natigayon ini nga ma operahan apang sa baylo nga makaguwa na kuntani ini sa ospital, nakitaan siya sang sintomas kag ginpa-idalom sa nasal swab test sa diin natukiban nga positibo ini sa COVID-19.
Samtang ang Orthopedic ward ang nagapabilin sa gihapon nga naka lockdown bangud sa pagpositibo man sang isa ka pasyente sang damlag lang.
