ILOILO – Tatlo ka mga banwa sa Probinsya sang Iloilo ang temporaryo nga indi magbaton sang locally stranded individuals (LSIs).
Santo sa Resolution No. 49 Series of 2020, gin-aprubahan sang Western Visayas Inter-Agency Task Force – Emerging Infectious Diseases ang moratorium sa pagbaton sang mga LSIs padulong sa banwa sang Janiuay, Oton kag Pavia.
Ang nasambit nga mga banwa ang nagpadala sang sulat sa Province of Iloilo kag Joint Regional Inter-Agency Task Force.
Ang Janiuay kag Pavia ang ginhatagan sang 14 ka adlaw nga period sang moratorium.
Nagakahulugan nga umpisa Oktubre 19 tubtub Nobyembre 2, indi anay magbaton ang Janiuay kag Pavia sang mga mapauli nga LSIs.
Katuyuan sini nga madecongest ang mga quarantine facilities.
Samtang ang Oton naman ang ginhatagan sang 7 ka adlaw nga period of moratorium.
Nagakahulugan nga umpisa Oktubre 19 tubtub 25, indi anay magbaton ang Oton sang mga mapauli nga LSIs.
Katuyuan naman sini nga madecongest, madisinfect kag ma preparahan ang dugang nga municipal quarantine facilities kag mahatagan ang mga frontliners kag health workers sang pahuway.
Ang resolution ang pirmado nanday Juan Jovian Ingeniero, Regional Director sang Department of Interior and Local Government (DILG) Region 6 kag Chairperson sang RIATF kag Dr. Marlyn Convocar, Regional Director sang Department of Health Region 6 kag Vice Chairperson sang Western Visayas Inter-Agency Task Force – Emerging Infectious Diseases Health Cluster.
