Ginkuwestyon ni Senador Jinggoy Estrada ang ginapahayag sini nga madasig nga pagdalagan sang mga kaso nga ginpasaka batok sa pila ka miyembro sang majority bloc sa Senado.
Ini ang kasunod sang ginpasaka sang Ombudsman nga kaso nga plunder kag graft batok sa iya bangud sa ginaalegar nga involvement sa flood control scandal.
Sa iya statement, ginpahayag ni Estrada nga nakit-an sini nga madasig ang pagsaka sang mga kaso sa majority bloc halin sang nag-ilis ang liderato sa Senado sang Mayo 11 sa diin ginbuslan ni Senador Alan Peter Cayetano si Senador Vicente Sotto III bilang Senate President.
“Kapansin-pansin din na, mula nang magpalit ng liderato sa Senado, naging mabilis ang pag-usad ng mga kasong kinasasangkutan ng ilang miyembro ng majority bloc,” suno kay Estrada.
“As I have said before, if this is the price that I have to pay for standing by my principles and for what I believe in, then so be it,” pahayag sini samtang ginapaathag nga gamiton nila ang tanan nga legal nga remedyo agud depensahan ang iya kaugalingon.
Antes kay Estrada, may gin-rekomendar man ang Field Investigation Office sang Ombudsman nga pag-file sang kaso nga plunder, graft, kag indirect bribery batok kay Escudero bangud sang ginaalegar nga pagbaton sang kickbacks nga P306 million kag P280 million halin sa nanuhay-tuhay nga flood control projects.
Una naman nga gin-anunsyo sang Ombudsman nga malapit na lang ipasaka ang kaso nga plunder kay Sen. Joel Villanueva bangud sang ginaalegar man nga involvement sa flood control kickback scheme.
May pending man nga preliminary investigation kay Sen. Rodante Marcoleta bangud naman sa alleged plunder, violations sang presidential decree nga nagadumili sang public officials sa pagbaton sang mga regalo, kag three counts sang indirect bribery.
Sa bahin ni Estrada, ini na ang ikatatlo nga kaso nga plunder nga iya ginapangatubang.
Sang 2001, lakip siya sa mga gin-akusaran kaupod sa iya amay nga si former President Joseph Estrada bangud sang illegal “jueteng” payoffs nga nagabalor sang P545 million.
Sang 2014, ginkasuhan man sang plunder si Estrada kaupod kay Janet Napoles bangud sang alleged misuse sang P200 million sa Priority Development Assistance Fund (PDAF).
Pareho nga gin-acquit sanday Napoles kag Estrada apang gin-basura sang Sandiganbayan ang pangabay ni Estrada nga i-dismiss man ang 11 counts of graft nga nag-ugat sa amo man nga kaso.
Wala sang ginrekomendar nga piyansa sa kaso subong nga ginpasaka batok sa iya nga may kaangtanan sa alegasyon nga nakabaton siya sang P573 milyon nga kickback halin sa mga proyekto sang flood control.#
