Daw wala sang pagtigulang ang 10-time Philippine Basketball Association (PBA) champion nga si June Mar Fajardo kun pagbulsa sang Most Valuable Player (MVP) award ang pagahambalan.
Sa PBA Leo Awards nga ginapatigayon sa Smart Araneta Coliseum subong nga Domingo, Agusto 18, ginbaton sang 34-anyos nga 6-foot-10 bruiser ang iya ikawalo na nga MVP award sa iya 12 ka tuig nga karera sa liga ukon halin sang na-draft siya bilang nagapanguna nga overall pick sa 2012 Rookie Draft.
Ang iya average nga 17.8 points, 13.4 rebounds, 2.8 assists, kag 1.7 blocks sa San Miguel Beermen amo ang nagbulig hakwat sa team nga makadaog sang Commissioner’s Cup championship kag maka-secure sang Finals appearance sa season-ending Philippine Cup.
Ginlutos sini sa amo nga award ang iya teammate nga si CJ Perez, Stephen Holt sang Terrafirma, Robert Bolick sang NLEX, kag former Barangay Ginebra banger nga si Christian Standhardinger.
Ini man ang ikaduha nga sunod-sunod nga edisyon nga na-claim ni Fajardo ang MVP plum matapos nabaton man ini sa Season 47. Antes sina, ginhatag man ini sa iya sang 2014 tubtub sa 2019.
Lakip man si Fajardo sa All-Defensive Team kun sa diin yara man sanday Cliff Hodge sang Meralco, Kemark Cariño sang Terrafirma, Joshua Munzon sang NorthPort, kag Chris Newsome sang Meralco.
Yara man siya sa First Mythical Team kaupod kanday Standhardinger, Arvin Tolentino, Perez, kag Newsome.
Si Stephen Holt nga nag-upod sa Terrafirma sa una nga season antes nagsaylo sa Barangay Ginebra amo ang nagdaog sang Rookie of the Year award samtang si Paul Zamar naman ang nagdala-pauli sang Samboy Lim Sportsmanship Award.
Si Jhonard Clarito sang Rain or Shine ang nakabulsa sang Most Improved Player honor.
Samtang, ang Second Mythical Team ang ginabug-usan naman nanday Hodge, Jason Perkins, Calvin Oftana, Juami Tiongson, kag Holt.
