Ginpasiguro ni House Speaker Faustino “Bojie” Dy III nga mangin transparent, may ara sang accountability kag nakatuon sa kinahanglanon sang publiko ang ila pagatalakayon sa Kamara sa ginaproponer nga P7.2 trilyon 2027 National Budget.
Suno kay Dy, pagapadayunon sang Kamara ang mga reporma nga ginapatuman sang nagligad nga budget deliberations, kalakip na diri ang hugot nga transparency kag security measures agud masiguro ang integridad sang ginaproponer nga budget.
Pahayag pa sini nga makabulig ang bag-o lang ginlunsyar nga LegisHear sa pagkumpleto sang budget.
Ang Legishear isa ka programa sang House of Representatives nga may tinutuyo nga dal-on ang proseso sa paghimo sang layi sa mga komunidad agud direkta nga mabatian ang opinion sang pumuluyo.
Magahatag man ini sang kahigayunan sa mga komunidad nga mapadala ang ila nga mga prayoridad bag-o dalayon nga aprubahan ang pondo para sa tuig 2027.
