Handa ang kampo ni Vice President Sara Duterte nga atubangon ang mga alegasyon nga ginahaboy batok sa iya.
Ini matapos gindesisyunan sang Senate Impeachment Court nga magpagwa sang subpoena para sa iya mga bank records kag buwis.
Suno kay Atty. Michael Poa, isa sa mga abogado ni Duterte, wala sila nagapugong sa mga nagaguwa nga mga dokumento, apang ginapangabay lamang nila nga sundon ang Konstitusyon, ang layi, kag mga patakaran.
Pahayag pa ni Poa nga handa sila pamatud-an nga wala sang basehan ang mga alegasyon nahanungod sa ginapahayag unexplained wealth ni Duterte.
Nahibaluan nga nagpagwa na ang Senado sang subpoena para sa Bureau of Internal Revenue (BIR), Anti-Money Laundering Council (AMLC), kag pila ka bangko.
Ginhatagan ang mga ini tubtob Hulyo 30 para isumiter ang ginapangayo nga mga rekord.
Temporaryo anay nga gin-untat ang impeachment proceedings bangud sa State of the Nation Address (SONA) ni Presidente Ferdinand “Bongbong” Marcos Jr. sa Lunes nga adlaw, Hulyo 27.
Nahibaluan nga nagapangatubang si Duterte sa mga kaso nga may kaangtanan sa ginapahayag nga paglapas sa Konstitusyon, graft and corruption, betrayal of public trust, bribery, kag iban pa nga mabug-at nga kaso.
