Magatililipon ang 12,000 ka mga delegates nga lunsay barangay officials sang probinsya sang Iloilo para sa “Liga Day 2024” sa Domingo, Septyembre 15, 2024.
Sa interview sang Bombo Radyo kay ex-officio Board Member Amalia Victoria Debuque, Presidente sang Liga ng mga Barangay-Iloilo Province, iya ginpahayag nga excited na ini nga makit-an ang mga barangay officials para sa culminating activity.
Apang nagpangayo na sang pasaylo si Board Member Debuque sa mga pumuluyo sa syudad bangud posible nga magpug-ok ang traffic sa area sang Iloilo Sports Complex nga amo ang venue sang kahiwatan bangud sa kadamuon sang mga delegates nga makadto.
Ginpasiguro man sang natungdan nga naga-coordinate ini sa mga opisyal sang Iloilo City ilabi na sa pagplano sa event agud ma hagan-hagan ang paggutok sang dalan sa Domingo nga adlaw.
Samtang, sa Septyembre 12, na ang championship sang Provincial Barangay Officials League sa Passi City Arena sa diin basketball kag volleyball ang mga sports nga ginapatigayon kag ginapartisiparan sang mga barangay officials.
Sang damlag lang, ginlunsyar man sang Liga ng mga Barangay ang “Barangay Aid on Wheels” sa diin magabulig ang Integrated Bar of the Philippines sa legal nga aspeto sa mga opisyal.
May yara man sang raffle draw kag Bida ka sa Liga sa diin ipakita ang talento sang mga barangay officials.
Pinaagi sini, pahayag ni Debuque, maka-connect ang barangay sa isa kag isa kag mangin mahapos na ini sa pagprogreso sang probinsya sang Iloilo.
