Kapin sa 1, 300 ka mga pulis sa pungsod, ginpahalin sa serbisyo

Naglab-ot sa kapin sa 1,300 ka mga pulis sa pungsod ang ginpahalin sa serbisyo bangud sang nagkalain-lain nga kaso nga ginapangatubang sang mga ini.

Suno sa Philippine National Police (PNP), resulta ini sang ila kampanya nga limpyuhan ang ila hanay paagi sa pagkuha sang mga miyembro nga may nahimo krimen kag iban pa nga mga paglapas sa disiplina kag layi sang mga kapulisan.

Dugang pa sang PNP, naresolbar man ang linibo ka administrative cases halin Agosto 26, 2025 tubtob Hulyo 15, 2026.

Naglapaw naman sa 2,000 ka pulis ang ginsuspinde, samtang 237 ang ginpapanaog ang ranggo.

Samtang, ang iban naman nga mga kapulisan ang ginbuhinan ang sweldo kag opisyal nga na-reprimand ukon ginsaway.