Handa na ang kaso nga igapasaka ni former Iloilo City Mayor Jed Patrick Mabilog batok kay Vice Mayor Jeffrey Ganzon.
Ini kasunod man sang pahayag ni Mabilog nga magapasaka ini sang kaso nga “libel” batok kay Ganzon sang nagligad nga tuig.
Sa interview sang Bombo Radyo kay former Mayor Mabilog, iya ginpahayag nga ginapangamuyuan na niya ang kaso nga ipasaka sa bise-alkalde sang syudad.
Suno kay Mabilog, nagapati siya sa kasuguan sang Ginoo nga mangin mapinatawaron apang para sa iya, tuman gid ka sakit ang ginhimo ni Ganzon.
Sang ginpamangkot naman ang anay alkalde nga ipat-pat ang mga dugang nga kaso, wala ini nagkomento.
Nahibaluan nga una na nga ginpahayag ni Vice Mayor Ganzon nga wala siya sang may madumduman nga “libelous” nga komento nga ginbuy-an batok kay Mabilog.
Ginarespeto man ni Ganzon ang pagpasaka sang kaso ni Mabilog kon nakabatyag ini sang ‘aggrieved’ ukon indi patas nga pagtratar.
Samtang, nagpahayag naman si Mabilog nga basi nagka-Alzheimer lang si Ganzon rason nga wala sini madumduman ang iya ginhimo.
