ILOILO CITY – Nagdangat na sa 72 ang kaso sang Coronavirus Disease 2019 (COVID-19) sa Western Visayas matapos ginkumpirma sang Department of Health 6 ang anum pa ka panibag-o nga kaso sang nasambit nga virus.
Sa nasambit nga numero, 27 diri ang naka recover kag siyam ang nagkalamatay.
Ang mga nagpositibo amo sanday: Patient no. 67, 28 anyos nga babayi sang Jaro, Iloilo City kag naka home quarantine samtang ang apat sa mga nagpositibo amo ang mga Overseas Filipino Workers kag sa subong temporaryo nga naka facility quarantine sa isa ka hotel sa syudad sang Iloilo.
Ang mga repatriates nga lunsay taga syudad sang Iloilo amo ang Patient no. 68 nga 30 anyos nga nga lalaki, Patient no. 69 nga 27 anyos nga lalaki, Patient no. 70 nga 29 anyos nga lalaki kag Patient no. 71 nga isa ka 30 anyos nga lalaki
Naka record naman sang labing-una nga kaso sang COVID-19 ang probinsya sang Guimaras paagi kay Patient no. 72 nga 27 anyos nga lalaki gikan sa Buenavista, Guimaras kag isa man sa mga OFW nga sa subong naka facility quarantine.
Kun pahat-pahaton, may yara na sang anum ka kaso sa Aklan, 13 sa Antique, lima sa Capiz, isa sa Guimaras, 20 sa probinsya sang Iloilo, apat sa Negros Occidental, siyam sa Bacolod City kag 14 sa syudad sang Iloilo.
