ILOILO CITY–Turf war ukon kompetensya sa illegal nga druga ang ginatudlo nga rason sa pagluthang-patay kay retired SPO1 Ronaldo Alag sa Villa Anita, City Proper.
Sa interview sang Bombo Radyo kay Police Senior Superintendent Martin Defensor Jr., director sang Iloilo City Police Office (ICPO), iya ginpahayag nga illegal nga druga ang mabaskog nga anggulo sa pagpatay kay Alag.
Ginpahayag ni Defensor nga isa sa mandu nga ginhatag sang Regional Director sa iya amo nga solbaron ang tanan nga riding-in-tandem, dakpon ang tanan nga naangot sa illegal nga druga kag proteksyunan ang tanan nga pumuluyo.
Sa subong suno kay Defensor, pagpanghangkat sa ICPO nga mahibalu-an kun sin-o ang mga katapo sang ginbasagan death squad nga nagapamatay sa mga drug personality.
Sa pihak sini, nagapalab-ot gid sang simpatiya kag pagpakig-unong ang ICPO Director kag ginpromisa nga mangin patas ang imbestigasyon.
Samtang, madamu pa sang narco-cops ang kapuod sang ginluthang-patay nga si retired SPO1 Ronaldo Alag ang wala pa sa gihapon madakpan.
Ginpahayag ni Defensor nga indi lang niya mahingadlan ang tanan nga pangalan sang narco-cops nga mahimo target sang riding-in-tandem.
Ang narco-cops sa syudad sang Iloilo ang ginalakipan sang retirado kag aktibo sa serbisyo kag naangot sa Odicta Drug Group kaupod ni SPO1 Alag.
Ang nasambit nga impormasyon suno kay Defensor ang naghalin sa iya masaligan nga informant.