May ginpaguwa na nga hold departure order batok kanday anay Bureau of Corrections chief Gerald Bantag kag former deputy officer Ricardo Zulueta.
Suno kay Department of Justice (DOJ) spokesperson Assistant Secretary Mico Clavano, ang hold departure order ang ginpaguwa sang Muntinlupa City Regional Trial Court Branch 206 sang Abril 25.
Ginpaguwa naman sang ahensya ang kopya sini kahapon nga adlaw.
Buot silingon sini, indi na mahimo makaguwa sa pungsod ang duha ka nasambit nga former officials sang Bureau of Corrections.
Pareho nga nagapangatubang sanday Bantag kag Zulueta sang kaso nga murder bangud sang gin-alegar kahilabtanan sa pagpatay sa brodkaster nga si Percival “Percy Lapid” Mabasa kag sa gin-alegar middleman nga si Jun Villamor.
Matandaan nga sang nagligad nga Abril 12 sang gindagdag ang warrants of arrest batok sa anay duha ka opisyal.
Una na nga ginpahayag ni Justice Secretary Jesus Crispin Remulla nga naka-kontak si Bantag sa isa ka myembro sang Gabinete kag nagpahayag sang intensyon nga magsungka sa otoridad.
