Lacson, gin-akusaran ang mag-utod nga Cayetano nga nakakuha sang P11.4 billion budget insertions sa 2025 GAA

Gin-akusaran ni Sen. Panfilo Lacson si Sen. Pia Cayetano nga nakaangkon ini sang ginabanta P4.7 billion budget insertion sa 2025 national budget.

Samtang, naglab-ot naman sa P6.7 bilyon ang ginapahayag budget insertion sang utod sini nga si si Sen. Alan Peter Cayetano.

Suno pa kay Lacson, ang mga proyekto nga gina-angot kay Sen. Alan Cayetano sa Taguig kag Laguna Lake ang posible nga reclamation projects nga gintago lamang bilang flood-control projects.

Ang reclamation project isa ka proyekto nga nagapatigayon sang paghimo sang bag-o nga duta paagi sa pagtambak sang balas, bato, ukon duta sa dagat ukon baybayon.

Pahayag pa ni Lacson nga ginkumpirma sang Philippine Reclamation Authority nga wala sang permit ang mga nasambit nga reclamation project.

Ginabanta nga 47 ka ektarya na ang na-reclaim samtang dugang naman nga 37 ka ektarya na ang ginapahayag nadugang.

Suno pa sa senador nga na-delay ang imbestigasyon matapos ma-pressure ang mga opisyal sang PRA sadtong budget deliberations.

Dugang pa ni Lacson, naglab-ot na sa 32 ang mga flood-management projects sa Taguig nga ginakabig sini nga posible may ara sang anomalya.

(TULFO SA HEARING)

Ginasalig naman ni Lacson kay Sen. Erwin Tulfo nga chairman sang Senate Blue Ribbon Committee ang desisyon kon ipadayon pa ang imbestigasyon nahanungod sa mga ginakabig nga anomalous flood-control projects.