Indi pagpatulan sang Police Regional Office VI ang mga alegasyon nga nagagwa nga pulis kag militar ang responsable sa stabbing incident sa General Luna St., Iloilo City Proper kun sa diin biktima si NUPL-Visayas Assistant Vice President kag NUPL-Panay Secretary-General Atty. Angelo Karlo Guillen.
Sa interview sang Bombo Radyo kay Police Brigadier General Rolando Miranda, director sang PRO VI, iya ginpahayag nga daw tanan na lang nga krimen nga nagakatabo, ginapasibangod sa Philippine National Police kag Philippine Army.
Ginpahayag pa ni Miranda nga indi gani niya kilala si Atty. Guillen nga amo ang nabun-an sa Aurora Subdivsion sang gab-i sang Marso 3.
Indi pa maka-isyu sang official statement si Miranda samtang wala pa sang kumpleto nga imbestigasyon sang Iloilo City Police Office.
Nahibaluan nga una na ginpahayag ni Atty. Teopisto Melliza, spokesperson sang NUPL, nga state forces ang yara sa likod sang krimen bangud sa PNP kag Philippine Army man naghalin ang mga pagpamahog sa kabuhi ni Atty. Guillen.
Nagaduda ang NUPL nga may kaangtanan ang insidente sa pagtindog ni Guillen nga abogado para sa mga napatay sa kontroberysal nga operasyon sang pulis sa Tapaz, Capiz kag bangud abogado man ini sang 16 nga mga ginpang-aresto sa amo man nga operasyon.
