Nalapawan na ni Los Angeles Lakers superstar LeBron James ang record ni six-time NBA Most Valuable Player Kareem Abdul-Jabbar sa pinakamalawig nga minutos nga paghampang sa regular season history sa liga.
Nalab-ot ni James ang pang-57,447 nga minuto kadungan sang paghampang kag pagdaog sang Lakers batok sa Sacramento Kings, Disyembre 20 PHT.
Antes kay LeBron, ang naga-uyat sini nga record amo si Abdul-Jabbar nga isa man ka six-time NBA champion. Nagtapos ini sa iya karera sang 1989 nga nakahampang sa sulod sang 57,446 minutes.
Naguba ini nga record sa ika-dies nga minuto nga hampang sang Lakers batok sa Kings — nga amo man ang team nga kasumpong ni James kadungan sang iya NBA debut kaupod sa Cleveland Cavaliers sang 2003.
Sa kabug-usan, 1,500 games na ang na-updan ni James sa iya bilog nga karera sa NBA.
“It’s just a commitment to the craft and to the passion and love I have for the game. I don’t take much time in the off-season. A little bit more time now,” pahayag sini matapos ang nakuha ang bag-o nga record.
Subong nga Disyembre, maga-tungtong na ang Lakers superstar sa edad nga 40-anyos. Duha na ka games ang iya na-miss subong nga season.
“I didn’t take much time in the offseason, no matter if I was making the 10 Finals appearances back-to-back and just always trying to keep my body in tip-top shape.”
Ini na ang iya pang-22 nga NBA season.
Sang nagligad nga tuig, nalapawan man ni LeBron si Abdul-Jabbar kag nangin all-time leading scorer nga subong may masobra na sa 41,000 points nga nahimo.
