Napuhag ang mga tawo sa palibot sang korte sa New York City kun sa diin ginahiwat ang trial sa kaso ni anay US President Donald Trump matapos nga may isa ka lalaki nga nagsunog sa iya kaugalingon.
Gintumod sang kapulisan ang lalaki nga si Maxwell Azzarello, 37, sang St. Augustine, Florida. Gilayon ini nga gin-respondehan sang mga pulis, gindala sa ospital, kag nagapabilin nga kritikal ang kondisyon.
Suno pa sa New York City Police Department, wala na sang pamahog sa seguridad sang publiko, apang gin-deploy ang mga personnel sang Bomb Squad para ma-check ang palibot.
Apat man ka police officers kag isa ka court officer ang nasamaran bangud sa pagpatay sa kalayo.
Suno pa sa hepe sang pulis, antes gintutdan sang lalaki ang iya kaugalingon, nag-kuha ini sang pamphlets sa iya nga backpack, ginlapta sa parke, kag sunod nga may ginbubo nga liquid sa iya lawas kag ginsindihan.
Natumba ini kag gilayon na nga nagdalagan ang mga sibilyan, pulis, kag court officers sa park agud mapatay ang kalayo.
Sa inisyal nga pahayag sang pulis, nagaguwa nga “propaganda-based” ang mga pamphlets nga naangot sa Ponzi schemes kag conspiracy theories. Ginapatihan man nga wala sang partikular nga persona ukon grupo nga gina-target si Azzarelo.
Ginpahayag man nga sini lang nga semana nag-abot sa New York si Azzarello kag wala ini sang kaupod sang nagsunog sa iya kaugalingon.
Antes sini nahimo ang insidente, may nabalhag man ini sa blog kun sa diin nalakip ang mga tinaga nga: “My name is Max Azzarello, and I am an investigative researcher who has set himself on fire outside of the Trump trial in Manhattan.”
Nahibaluan nga yara si Trump sa ika-15 nga panalgan sang korte sa amo nga area sa Manhattan kun sa din ginapatigayon ang nagapadayon nga trial sa iya nga kaso-kriminal.#
