Na-rescue sang otoridad ang isa ka lalaki nga nagapautaw-utaw sa lawod nga sakop sang Barangay Poblacion South, Oton, Iloilo.
Natigayon ini matapos nagtawag ang Oton Search and Rescue team sa pulis sang nakit-an ang lalaki nga ginabanta 100 metros ang distansya sa hunasan samtang sakay ini sa improvised nga balsa.
May dala man ini nga empty bottles sa iya bag agud nga magamit sini sa iya pagpa-utaw-utaw sa dagat.
Sa interview sang Bombo Radyo kay Police Staff Sergeant Churchill Acosta, imbestigador sang Oton Municipal Police Station, iya ginpahayag nga nagpanugid ang lalaki nga luyag sini magtabok sa probinsya sang Guimaras.
Base sa pahayag sini sa kapulisan, nagapauli siya sa Barangay Taal, Molo, Iloilo City.
Indi pa makuhaan sang dugang nga impormasyon ang lalaki, apang ginalantaw nga posible nga may deperensya ini sa pang-huna-huna.
Nagapabilin anay ini sa paghinakop sang mga pulis samtang ginahulat ang pamilya ukon mga kakilala nga sugaton ini.
