PASSI CITY – Wasak ang ulo sang isa ka lalaki matapos nalasakan sang Ceres Bus sa Passi City, Iloilo.
Ang biktima amo si Jonathan Gonzales, 52, sang Saligumba St.,Poblacion Ilawod sang nasambit nga component city.
Sa interview sang Bombo Radyo kay Police Executive Master Sergeant Niel Amador, imbestigador sang Passi City Police Station, iya ginpahayag nga halin sa Brgy. Man-it ang biktima kag nagapadulong na sa city proper sang natabo ang aksidente.
Suno kay Amador, yara sa husto nga lane si Gonzales apang na sideswipe kag nalasakan sang Ceres Bus.
Ginpahayag ni Amador nga posible nga wala nakatalupangod ang driver sang bus bangud nga wala ini nagpondo apisar nga nalasakan na ang biktima.
Posible man suno sa natungdan nga hungod nga nagpalagyo ang driver rason nga padayon pa ang hot pursuit operation.
Gindala sa hospital ang biktima para sa official declaration sang doktor.
