Liwat nga maga-updanay sanday Lebron James, Stephen Curry kag Kevin Durant bilang team sa isa ka intense line-up para sa NBA All-Star Game.
Ang bag-o nga estilo sang All-Star Game ang pagatungaon sa tatlo ka koponan, duwa sini ang ginalakipan sang mga player nga mga Amerikano kag ang isa naman ang ginalakipan sang mga international players.
Maga-kontrahanay ang tatlo ka koponan sa isa ka round-robin nga min-tournament kag ang duwa nga nagapanguna nga koponan ang magaatubangay sa final game.
Sanday James, Curry kag Durant nga tatlo ka haligi sang koponan sang USA nga nakakuha na sang gold medal sa 2024 Olympics sa Paris ang updan nanday Jaylen Brown sang Boston, Jalen Brunson sang New York Knicks, kag Kawhi Leonard sang Los Angeles Clippers.
Ang magakumpleto sang lineup nga ginatawag nga “USA Stripes” sanday Donovan Mitchell sang Cleveland kag Norman Powell sang Miami.
Ang isa pa ka koponan sang USA Stars ang pagalakipan nanday Cade Cunningham sang Detroit, Anthony Edwards sang Minnesota, kag Chet Holmgren sang Oklahoma City.
Upod man sa roster sanday Devin Booker sang Phoenix Suns, Tyrese Maxey sang Philadelphia, kag Jalen Duren sang Detroit.
Samtang pagapangunahan naman ang ”World” team ni Shai Gilgeous-Alexander sang Oklahoma City nga sa karon ang NBA Most Valuable player, upod man si Luka Dončić sang Los Angeles Lakers kag Victor Wembanyama sang San Antonio Spurs, pati man si Nikola Jokic sang Denver.
Pagahiwaton ang NBA All Star Game sa Los Angeles sa Pebrero 15.
