Nag-apelar ang local government unit sang New Lucena, Iloilo sa national government nga mahatagan sang isa pa ka firetruck ang ila banwa agud mapabaskog pa ang ila kapasidad sa pagresponde sa tion sang mga emerhensya.
Sa interview sang Bombo Radyo kay New Lucena Mayor Carl Vincent Mondejar, ginpahayag sini nga bisan nagafunction pa ang isa nila ka firetruck nga ginapanag-iyahan sang LGU, kinahanglan gid sang banwa ang dugang nga yunit agud mas epektibo ang pagserbisyo sa pumuluyo kon may ara sang magluntad nga sunog.
Suno sa alkalde, ang nagaserbe subong sa ila nga firetruck amo lamang ang isa ka LGU-owned firetruck nga may kapasidad nga 1000 gallons.
Samtang ang duha pa nila ka firetruck indi na magamit bangud ang isa sini naga-edad na sang 45 ka tuig, kag ang isa naman halin pa sang tuig 1988 kag madamo na sang guba.
Bangud sang kakulangan sa firetruck, nagakinahanglan pa ang ila banwa sang bulig halin sa kaiping nga mga LGU kon may nagakatabo nga dako nga insidente sang sunog sa ila nga banwa.
Suno kay Mondejar, maayo nga may duha ka operational nga firetruck ang banwa agud mas madasig ang pagresponde sa mga emerhensya.
Ginpahayag man sang alkalde nga nakapadala na sila sang pormal nga request para sa dugang nga firetruck sa Department of the Interior and Local Government kag sa Bureau of Fire Protection.
Apang, ginpabutyag niya nga kinahanglan gid nga maghulat bangud madamo man sang mga banwa nga nagapila kag nagakinahanglan man sang firetruck sa ila nga mga LGU.
