ILOILO CITY- Ginpaandaman ni Liga ng mga Barangay President Irene Ong ang tanan nga kaangay nga mga opisyal sang barangay sa syudad sang Iloilo nga tumanon ang ginpagwa ni Iloilo City Mayor Jerry Treñas nga Memorandum Order tuhoy sa clearing operations sa mga dalanon sang syudad.
Ini may kaangtanan man sa Department of the Interior and Local Government Memorandum Circular 2019-121, nga gin-isyu ni DILG Secretary Eduardo Año santo sa direktiba ni Presidente Rodrigo Duterte sa iya State of the Nation Address sang Hulyo.
Sa interview sang Bombo Radyo kay Ong, nga amo man ang chairman sang Committee on Barangay Affairs and Community Development, iya ginpahayag nga nagalaum siya nga nahangpan sang mga opisyal sang barangay nga may salabton sila kag mahimo nga masuspendi kun indi nila mamintinar ang ila area nga nahawanan na sang Iloilo City Government.
Nahibaluan nga nagpatigayon sang pagsinapol ang Liga ng mga Barangay sa syudad upod ang Public Safety and Transportation Management Office, kag Task Force on Anti-Squatting and Illegal Structures kaangot sa clearing operation ukon Oplan Hawan sang syudad.
