ILOILO CITY- Ginpa-Bombo sang isa ka residente sang Syudad sang Iloilo ang nadula nga listahan sang ila mga pangalan nga natalana kuntani nga magpabakuna subong nga adlaw sa Iloilo Convention Center (ICC).
Sa interview sang Bombo Radyo kay Hope Occeña, iya ginpahayag nga nagpadulong sila sa ICC sang Biyernes, Hulyo 9, apang wala sila nakahingagaw.
Suno kay Occeña, ginpalista sila sang pangalan kag contact number sa papel kag ginhambalan nga magbalik subong nga adlaw.
Apang suno sa iya, pag-abot sa venue, wala ang ila pangalan kag indi man makit-an ang papel kon sa diin sila ginpalista.
Dugang pa sang tagreklamo, nagpangakig pa ang staff sang Iloilo City Government nga ila ginpamangkutan kon sa diin ang listahan.
Ginpangabay niya nga kuntani may yara sang husto nga koordinasyon kag turn- over sang mga importante nga listahan agud nga indi man maruya ang mga pumuluyo nga nagakadto sa venue agud magpabakuna.
