ILOILO CITY- Ginpakigbahin sang couple nga lunsay Bar passers ang ila mga inagihan kag preparasyon antes nalab-ot ang handom agud mangin kabahin sang mga masunod nga batch sang abogado nga nakapasar sa bag-o lang gin-release nga resulta sang Bar exam.
Sa interview sang Bombo Radyo kanday John Marti Maghopoy kag Charissa Matiling, batch 2020 graduates sang bachelor of Law sa University of San Agustin College of Law, ila ginpahayag nga ang pag-eskwela sa abogasiya kaangay man sang paghigugma.
Suno kay Maghopoy, ini bangud nga bilang estudyante, kinahanglan nga naga-exert gid sang effort kag ginatinguhaan gid nga mahangpan ang ginatun-an kaangay sang ginahimo sa tawo nga ginapalangga.
Suno naman kay Matiling, apisar stressful man ang kabuhi bilang estudyante, kinahanglan nga makahibalo mangita sang paagi agud malingaw, mangin positibo ang panan-awan apang dapat nga handa sa ano man nga indi maayo nga resulta.
Panugyan nila sa iban nga couple nga may mga handom man nga luyag mahatagan sang katumanan: himuon nga inspirasyon ang kada isa.
Isa man ka interesante nga butang nga ila ginpakigbahin amo ang ila pagkahilig sa pagkaon sang batchoy nga may utok.
Nahibaluan nga nagakaon gid sang batchoy ang duha sang gin-anunsiyo ang resulta sang Bar kag sang nakumpirma nga sila ang nakapasar, naghilibion ang mga ini samtang nagakaon sang batchoy.
