ILOILO CITY – May yara sang koordinasyon kay Iloilo City Mayor Jerry Treñas ang pagbulig ni Iloilo City Lone District Cong. Julienne Baronda sa pagpapauli sa mga Locally Stranded Inviduals kag Repatriated Overseas Filipino Workers.
Sa interview sang Bombo Radyo kay Mayor Treñas, iya ginpahayag nga nagakadapat sundon sang mga naga-abot nga mga LSIs kag OFWs sa syudad ang bag-o nga protocol sa diin indi na maggamit sang rapid test sa baylo reverse transcription polymerase chain reaction test (RT-PCR) test na ang gamiton agud mahibalu-an kun bala infected ukon indi sa COVID-19 ang tawo.
Magluwas sini suno sa alkalde, indi naman pag ipa-idalom sa home quarantine ang mga LSIs kag OFWs sa baylo ibutang ini sa facility quarantine agud malikawan nga maglapta pa ang virus bangud sa mga impormasyon subong nga ang iban sa mga locally stranded individuals nga nagapa-idalom sa home quarantine ang nagaguwa man sa gihapon sa guwa sang ila balay.
Nahibaluan nga ginpirmahan na ni Mayor Treñas ang Executive Order 96 ukon ang “Mandatory Protocols for Returning Residents and Authorized Persons Outside Residents coming from NCR, Cebu City and Talisay City, Cebu.”
