ILOILO CITY- Indi maghatag sang konsiderasyon ang Land Transportation Office Region 6 sa mga trucks kag iban nga salakyan nga naga-overloading apisar nagapartisipar pa ini sa Dinagyang Festival 2020.
Ini matapos nagpalab-ot sang kabalaka ang mga tribu gikan sa syudad kag probinsya nga magapasakop sa mga aktibidad sa diin ginalauman nga magaginutok ang mga ini sa mga truck kag salakyan padulong sa mga judging areas.
Sa interview sang Bombo Radyo kay Atty. Gaudioso Geduspan, director sang Land Transportation office Region 6, iya ginpahayag nga ipatuman nila sa gihapon ang pag-apprehend ukon pag flag-down sa mga salakyan nga nagalapaw sa registered passenger capacity.
Suno kay Geduspan, wala sang suspension sang order ang Central office sang Land Transportation Office tuhoy sa nasambit nga layi subong nga Dinagyang.
Nanindugan ang nantungdan nga ang ila pag-istrikto ang para man sa road safety sang tanan.
