Ginbawian gid sang kabuhi ang mag-amay matapos nakaangkon sang patal nga pilas sa ulo sang nagbunggo ang ila nga ginasakyan nga Isuzu MU-X sa isa ka wing van truck sa Barangay Bantud Fabrica, Dumangas, Iloilo.
Ang mga biktima amo sanday Barangay Kagawad Joey Allison Hermo, 34, kag amo ang naga-drive sang SUV, kag amay nga si Porfirio Hermo Jr., 65, lunsay mga residente sang Aurora Del Pilar, Dumangas, Iloilo.
Ang driver naman sang wing van truck amo si Joey Patricio, 30, residente sang Maninang, Sapi-an, Capiz.
Naghalin ang truck sa Roll on -Roll off (RoRo) port sa Dumangas, Iloilo kag padulong sa Tacas, Jaro, Iloilo City; samtang ang SUV naman ang halin sa Iloilo City kag papuli na sa Dumangas, Iloilo.
Sa interview sang Bombo Radyo sa driver sang truck, iya ginpahayag nga sa kondisyon man ang iya nga lawas kag yara man sa husto nga lane ang iya salakyan.
Suno kay Patricio, indi man siya madasig nga magpadalagan bangud puno sang sinako sang feeds ang iya nga truck.
Ginpahayag sang natungdan nga nagbusina pa gani siya apang nagdulu-diretso lang kag wala sang kontrol ang salakyan sang mga biktima.
Nagpalab-ot naman sang mensahe sang pagpakig-unong si Patricio sa pamilya sang napatay nga mag-amay kag nagalaum siya nga indi na siya magdugay pa sa presuhan bangud aksidente man ang natabo.
Suno naman kay Police Major Joeven Arevalo, hepe sang Dumangas Police Station, padayon pa subong ang imbestigasyon sang mga pulis angot sa insidente.
Tuman ang impact sang pagkabunggo kun sa diin magluwas sa ulo, may injury man sa liog kag ulo ang mga biktima.
Gindala pa ang mga ini sa ospital apang gindeklarar nga dead on arrival.
