Patay ang mag-asawa nga Pinoy nga nagapuyo sa Estados Unidos sang Amerika matapos nabungguan sang suspek nga nagapalagyo sa pulis bangud sa iya kinawat nga salakyan.
Ang mga biktima amo sanday Ryan Ambrosio, 45, kag asawa sini nga si Jen, 43, mga residente sang Farmington Hills sa estado sang Michigan.
Suno sa Michigan State Police, natabo ang insidente pasado 1:00 sa kaagahon sang Enero 6 sang papauli na kuntani ang duha halin sa ila nga date.
Ginpahayag sang pulis nga sang amo nga tion, may ginalagas man sila nga isa ka lalaki nga nagpangawat sang pickup. Madasig ang padalagan sang suspek nga wala sang headlights kag sang ulihi, nasugata sini kag nabungguan ang SUV sang mag-asawa.
Insigida nga ginkamatay sang duha ka mga biktima ang mga patal nga samad nga ila nga naangkon.
Bangud sa hinali nga kamatayon, nailo ang ila anum ka mga kabataan nga naga-edad pa lamang sang duha tubtub siyam ka tuig.
Kasunod sini, may GoFundMe campaign nga ginhimo para sa duha kun sa diin gindumdom sila kag ang ila kaayo. Ginpaathag man sa kampanya nga ang extended family sang mga kabataan ang magabuligay agud nga matatapan sila sa ila nga pagdaku.
Sa pihak nga bahin, ang 35-anyos naman nga suspek nga residente sang Romulus, Michigan, kag ang 29-anyos nga babayi nga iya pasahero halin sa Detroit ang gindala man sa ospital bangud sa ila seryoso nga kondisyon kasunod sang insidente.
Itugyan ang kaso sang duha sa Oakland County Prosecutor’s Office kun matapos na sang Michigan State Police ang imbestigasyon. #
