PAVIA, ILOILO – Dakop ang mag-utod kag ang jeepney driver sa magkatuhay nga buybust operation sa Pavia, Iloilo.
Sa una nga buybust operation nga ginpatigayon sang Pavia PNP kag sang Provincial Drug Enforcement Unit sa Brgy. Jibao-an, dakop sanday Ivan John Fernandez, 29 anyos kag si Irvin Fernandez, 25 anyos nga lunsay tumandok sa nasambit nga lugar.
Nabaklan sang isa ka sachet sang suspected shabu sa balor nga P2,500 ang mag-utod kun sa diin ginapahayag nga sa Bacolod City naghalin ang supply sang illegal drugs.
Nakuha man sa mag-utod ang isa ka itom nga sling bag nga may unod nga itom nga wallet, isa ka itom nga pouch, dugang nga lima ka sachet sang suspected shabu nga nagabalor sang P80,000 kag buy bust money nga P2,500
Kasunod nga nadakpan sa buybust operation nga ginpatigayon sa Bangga 5 sa Brgy. Jibao-an ang jeepney driver nga si Benjie Cristales, 40 anyos sang nasambit nga lugar.
Nabaklan si Cristales sang isa ka sachet sang suspected shabu sa balor nga P2,000.
Nakuha kay Cristales ang dugang nga pito ka sachet sang suspected shabu nga nagabalor sang P25,000 lakip ang buy bust money nga P2,000.
