Masobra sa tunga ka milyon ka pesos ang balor sang iligal nga droga nga nakumpiskar sa tatlo ka persona sa Zone 2, Brgy Caingin, La Paz, Iloilo City.
Ang mga arestado amo sanday Archie Tipanan, 35, construction worker, kag residente sang nasambit nga barangay; magulang ni Archie nga si Eden Rose Robles, 40, kag residente sang amo man nga lugar; kag live-in partner ni Archie nga si Margarita Conception Sorilla, 27.
Si Archie ang main target sang operasyon; samtang ginkabig naman nga street-level individual ang iya utod nga babayi kag high-value individual ang iya nga live-in partner.
Nabaligya sa police posuer-buyer ang isa ka sachet sang suspected shabu nga ginabanta nagabalor sang P7,000.
Kabug-usan nga recoveries amo ang 20 ka sachets sang suspected shabu nga nagabalor tanan sang P544,000.00.
Sa interview sang Bombo Radyo kay Archie, iya ginpahayag nga nakaagi man siya preso kag nakaguwa sang 2013 bangud sa iya nga ginpahayag pagbisita sa drug den.
Ginpahayag sini nga wala man sang labot ang iya nga utod kag live-in partner sa iligal nga droga kag ginatugyan na lang sini tanan sa Ginuo.
