Ginklaro sang kampo sang mga Atayde nga naglain lang ang pamatyag ni Maine Mendoza gani nga wala ini nakatambong sa espesyal nga okasyon sang ila pamilya sang damlag lang.
Absent si Maine sa birthday celebration nanday Art kag Ria Atayde nga amo ang nagdabok sang huring-huring sa social media nga may problema sa relasyon sang host-actress kay Arjo Atayde.
Sabat naman sang official showbiz PR sang pamilya Atayde nga si Chuck Gomez, may masakit lang si Maine. Wala ini sang ginhatag nga dugang nga detalye.
Matandaan nga gin-post ni Bayani Agbayani sa TikTok ang video sang birthday celebration, kag sang madamo na ang namangkot kun sa diin si Maine, gin-delete niya ini.
Depensa sini, siya mismo ang nagdesisyon nga i-delete ang video bangud nareyalisar sini nga pribado ini nga okasyon. Ginpahayag man sini nga naglain ang pamatyag ni Maine sang amo nga adlaw.
Sang birthday celebration sang aktres sang Marso 3, wala man sang bisan isa ka post nga yara ang iya bana.
Sang Marso 5, nag-post man ang host-actress sang mga picture kag wala gihapon si Congressman Arjo Atayde. Caption sini sa iya post: “Grateful for the overflowing birthday love. Thank you for the greetings and wishes. Happy 31st!”
Sang Marso 14, gindugang ni Maine ang post sang iya trip sa Vietnam kaupod ang iya mga abyan nga may caption nga “hcm on film.”
Wala pa sang opisyal nga sabat halin mismo sa mag-asawa kaangot sa amo nga isyu.
Matandaan nga ginkasal ang celebrity couple sang Hulyo 28, 2023 sa isa ka intimate ceremony sa Alphaland Baguio Mountain Lodges Chapel. Antes sang kasal, masobra apat ka tuig sila nga nag-updanay bilang magkarelasyon.#
