Ginpasa na sa Armed Forces of the Philippines (AFP) ang nagalagaw subong nga lista sang mga government officials kag former generals nga amo ang ginaalegar yara sa likod sang destabilization plot batok kay President Ferdinand Marcos Jr.
Suno kay Communications Undersecretary Claire Castro, base sa militar, tun-an sang ila nga intelligence community ang amo nga alegasyon.
Matandaan nga ang columnist nga si Mon Tulfo ang nag-post sang listahan sa iya social media account.
Gin-akusaran sini sanday Vice President Sara Duterte, Davao Rep. Paolo Duterte kag former Ilocos Sur Governor Chavit Singson nga amo ang naga-pondo sa destabilization plot.
Lakip naman sa mga personalidad nga involved suno kay Tulfo sa reported destabilization amo sanday Atty. Ferdinand Topacio, former Executive Secretary Vic Rodriguez, Sen. Rodante Marcoleta, retired Gen. Romeo Poquiz, kag Baguio City Mayor Benjamin Magalong.
Indi magpanugid si Tulfo kun sa diin sini nakuha ang listahan.
Una naman nagsabat si Magalong kag gintawag nga “wala sang basehan” ang pag-angot sa iya sa destabilization.
Sa bahin ni Vice President Duterte, gintawag sini nga tsismis ang mga impormasyon nga wala man sang mga ebidensya.
Indi ini ang una nga tion nga may mga huring-huring nga may destabilization plot batok sa administrasyon, apang nagapanindugan naman si Marcos nga mabakod ang iya liderato sa pihak sang mga istorya sang ginaalegar nga kudeta.
