Nadiskubrehan sang Palestinian Civil Defense ang mass grave sa sulod sang ospital sa Khan Younis sa Gaza kun sa diin nasapwan ang 180 ka mga bangkay.
Matandaan nga Abril 7 sang gin-withdraw sang Israel ang tropa sang ila militar halin sa amo nga syudad apang halos indi naman mapuslan ang itsura sini bangud guba na ang mga building tuga sang pagpamomba.
Suno pa sa mga opisyal, nahamtang ang mass grave sa Nasser Medical Complex kun sa diin nalakip sa mga bangkay amo ang mga tigulang nga babaye, mga kabataan, kag bataon pa nga mga lalaki.
Pahayag naman sang Palestinian emergency services, padayon ang ila nga search kag retrieval operations sa posible nabilin pa nga mga biktima.
Antes sini, matandaan nga may mass grave man nga nakit-an sa al-Shifa Hospital kasunod sang duha ka semana nga pagpang-atake sang militar sang Israel. Isa lamang ini sa madamo nga mass graves nga nadiskubrehan sa al-Shifa nga amo ang pinakadaku nga medical facility sa Gaza.
Sa kabug-usan halin sang natabo ang Israel-Hamas war sang Oktubre , 2023, masobra na sa 34,000 ka Palestinians ang napatay sa Gaza kun sa diin two-thirds sang casualties amo ang kabataan kag kababainhan.
