Talagsa ka lang makakita sang tawo nga wala nahadlok sa man-og, ilabi na kun agresibo ini kag una nga mang-atake sa tanan nga iya makit-an.
Sa Bohol, natabo ini sa ka 48-anyos nga lalaki nga si Boljulio Aleria, residente sang barangay Cabayugan sa banwa sang Calape, sang ginbalabagan sang daku nga man-og ang iya ginadala nga motorsiklo.
Pasado ‘las dos na sa kaagahon sang amo nga tion kag amo na lang ang kakibot si Aleria sang nakit-an ang reticulated python ukon ang ila ginatawag nga “baksan” nga nagalaba sang tatlo ka metros kag daw botelya na sang beer ang kadakuon sang iya lawas.
Sang una daw okay pa sa lalaki bangud abi niya matabok lang ang man-og apang amo na lang ang kakulba sini sang nagburambod ang man-og sa iya kag ginkagat pa sini ang iya nga butkon.
Diri kag nagbato si Aleria.
Ginpangita niya ang liog sang man-og, ginkuga, kag ginkagat man niya ini.
Masobra 10 ka minutos ang engkwentro sang duha tubtub nga napatay ang man-og.
Gindala si Aleria sa Governor Celestino Gallares Medical Hospital sa Tagbilaran City para mabulong ang iya nagadugo nga kamot.
Apisar sang insidente, nahim-os si Aleria bangud nahibaluan niya nga kaangay sa iban nga pythons, indi man venomous ang man-og nga nagkagat sa iya.# Photo: Roy Moraleta
