Ginrekomendar sang Field Investigation Bureau sang Ombudsman ang pagpasaka sang kaso nga plunder kag bribery batok kay Senator Rodante Marcoleta bangud sang ginaalegar pagbaton sang P75-million nga campaign donations sang nagligad nga tuig.
Sandig sa complaint-affidavit nga pirmado sang Mayo 18, ginaduso sang investigators nga ma-indict si Marcoleta sa kaso nga plunder kaupod kay former Quezon City 2nd District Rep. Mike Defensor kag duha ka iban pa nga ginaalegar nagdonar kay Marcoleta.
Luyag man sang investigators nga ma-indict ang senador bangud sa indirect bribery.
Ginmanduan ang apat nga magpasa sang counter-affidavits sa preliminary investigation nga ginapatigayon sang Ombudsman base sa order nga pirmado sang May 21.
Matandaan nga sang nagligad nga tuig, may nauna na nga kaso sa Commission on Elections (Comelec) kun sa diin gin-imbestigaran si Marcoleta bangud sa non-disclosure sang donation sa iya nga Statement of Contributions and Expenditures (SOCE).
Sang amo nga tion, wala nagrekomendar ang Comelec sang ano man nga kaso batok sa senador bangud suno sa poll body, ang non-disclosure ang wala na ginakonsiderar nga election offense sa idalom sang gin-amyendaran nga Omnibus Election Code.
Apang pag-abot sa Ombudsman, ginaduso gihapon nga pasabton si Marcoleta.
“While respondent Marcoleta’s failure to declare the donations/contributions from respondents Defensor, Espiritu, and Viray did not constitute any election offense, his acts … should nevertheless give rise to criminal and administrative liabilities,” suno sa complaint-affidavit.
Ginahulat pa ang mangin official statement sang senador kasunod sang amo nga panumbungon batok sa iya.
