Gin-aprubahan ni President Ferdinand Marcos Jr. ang importasyon sang tubtub 150,000 metriko tonelada sang kalamay agud nga mapabilin nga estable ang presyo sini nga produkto sa Pilipinas sa tunga sang inflation.
Suno sa Presidential Communications Office, nagpasugot si Marcos sa importasyon kasunod sang pagsapol kag rekomendasyon nagikan sa Sugar Regulatory Administration (SRA).
Ginpahayag pa ni Marcos nga matumod kun pila gid ang eksakto nga amount sang iga-import nga kalamay kun ma-determinar naman ang eksakto nga amount sang suplay subong sa pungsod.
Suno pa kay Marcos nga amo man ang tiglikom sang Department of Agriculture, bukas ang gobyerno sa pag-import sang kalamay sa tanan nga traders.
Antes sini, una na nga ginpahayag sang SRA nga pag-abot sang Agusto 2023 nga amo naman ang pagtakop na sang milling season, may yara sang negative ending stock nga 552,835 metric tons sa pungsod.
Ginpahayag man una sang SRA nga kinahanglan ang importasyon sang 100,000 metric tons tubtub sa 150,000 metric tons sang kalamay agud nga malikawan ini nga kakulangan sa suplay.
