Ginmanduan ni President Ferdinand Marcos Jr. ang Philippine Health Insurance Corporation (PhilHealth) nga i-postpone ang pagsaka sa premium rates kag income ceilings nga natalana kuntani nga ipatuman subong nga tuig.
Sa memorandum halin sa Office of the President nga pirmado ni Executive Secretary Lucas Bersamin, ginsaad nga rason sa mandu sang presidente amo ang gintuga sang Covid-19 pandemic nga socioeconomic hardships para sa mga Pilipino.
Subong nga 2023, natalana kuntani nga pasakaan ang PhilHealth premium rate halin sa 4 percent pa-4.5 percent kag ang income ceiling halin sa P80,000 pasaka sa P90,000.
Ipatuman kuntani ini sandig sa Universal Health Care Act kun sa diin may yara sang tuigan nga 0.5% nga increase sa premiums, umpisa sang 2021 tubtub nga malab-ot na sini ang 5-percent limit sa 2025.
Una na nga ginpahayag sang PhilHealth nga ang 4.5-percent increase sa premiums amo ang makabulig sa state-run insurance corporation nga mapadayon ang ihatag nga benepisyo sa mga myembro sini.
Apang suno sa memorandum halin sa Office of the President nga ginpaguwa subong nga Lunes, Enero 2, tuyo sang gobyerno nga hatagan sang “financial relief” ang mga Pinoy sa tunga sang mabudlay nga mga tion nga epekto pa sang pandemya.
Sang 2021, matandaan nga gin-postpone man ni anay Presidente Rodrigo Duterte ang pagsaka sa PhilHealth member contributions bangud sa COVID-19 pandemic. ##
