Maga-byahe si President Ferdinand ‘Bongbong’ Marcos, Jr. padulong sa Indonesia subong nga adlaw agud magtambong sa 42nd Association of Southeast Asian Nations (ASEAN) Summit.
Sa iya pagpakigkita sa mga heads of state sang mga pungsod sa Southeast Asia, ginalauman nga iduso ni Marcos ang food kag energy security, climate resilience kag protection para sa migrant workers.
Suno sa Department of Foreign Affairs (DFA), lakip pa sa mga isyu nga posible mahambalan amo ang pagbangon sang ekonomiya, pagtapna sa transnational crimes, pagpaayo pa sang technical kag vocational education kag training kag ang pagsaylo sa renewable kag alternatibo nga teknolohiya para sa enerhiya.
Patigayunon ang opening ceremony sa amo nga summit buwas, Mayo 10. Ginalauman nga makabalik si Marcos sa Pilipinas sa Huwebes.
Domingo sang gab-i sang nakaabot si Marcos sa pungsod matampos nagtambong sa koronasyon ni King Charles III sa London, United Kingdom; kag pagkatapos man sa pagbisita sa Amerika kag bilateral talks kay President Joe Biden. #
