Nakabalik na sa Pilipinas si President Ferdinand “Bongbong” Marcos Jr. kag ang bug-os nga delegasyon sang Pilipinas matapos ang mabinungahon nga partisipasyon sa 42nd Association of Southeast Asian Nations (ASEAN) summit sa Indonesia.
Ang pagpadulong sa Indonesia amo ang ika-13 na nga byahe ni Marcos sa guwa sang pungsod halin sang nagpungko ini bilang presidente sang Pilipinas.
Sa iya nga speech sang siya ang nag-abot, ginpakigbahin ni Marcos nga lakip siya sa mga nagpanawagan nga tapnaon na ang mga kalakasan kag krisis sa Myanmar; isa sa mga nagduso sang malinong mga pamaagi agud nga ma-resolbar ang away sa teritoryo; kag isa man siya sa nagpabutyag sang kahangawa sa masobra na sa isa ka tuig nga away sa Russia kag Ukraine.
Isa man si Marcos sa nagsuporta agud mangin myembro na ang Timor Leste sa ASEAN.
Ginalauman man sang presidente nga maka-trabaho sang dugang kaupod kay Indonesian President Joko Widodo kag iban pa nga lider sa Southeast Asia ilabi na sa ila natalana nga liwat nga pagkit-anay para sa 43rd Summit and Related Summits sa Jakarta sa bulan sang Septyembre.
Sa isyu naman sa West Philippine Sea, ginpahayag ni Marcos nga ginpabaskog pa sini ang commitment sang Pilipinas sa malinong nga resolusyon sa mga indi paghangpanay, kag nagduso man ini sang maritime order nga naka-sandig sa layi kag naka-base sa United Nations Convention on the Law of the Sea (UNCLOS)
