Indi sigurado apang nagpalutaw sang posibilidad si Executive Secretary Lucas Bersamin nga nagaplano na si President Ferdinand “Bongbong” Marcos Jr. sa pag-appoint sang tiglikom sang Department of Agriculture (DA).
Si Marcos amo ang nagapamuno sa amo nga ahensya halin sang nagpungko man siya bilang presidente sang 2022.
“I think he’s on the way to that,” sabat sini sang ginpamangkot kun magapili na ang presidente sang tiglikom sa DA.
Suno kay Bersamin, posible nga nahibaluan man sang presidente nga kinahanglan na sini sang regular nga secretary, apang dapat man suno sa iya nga busision gid ang mangin tiglikom kag dapat nga may masangkad nga ikasarang bangud tuman ka damo ang isyu nga nagapalibot sa amo nga ahensya.
Posible man suno sa iya nga may shortlist na si Marcos ukon listahan sang iya paga-pilian.
Una na nga ginpahayag ni Marcos nga bayaan lamang niya ang posisyon sa DA kun makit-an niya nga yara na sa lugar ang tanan nga sistema.
Pahayag pa sini, siguruhon niya anay nga husto ang food supply sa pungsod, barato ang mga balaklon nga pagkaon, kag maayo ang palangabuhian sang local farmers. #
