Gin-eleher si Senator Mark Villar bilang chairman sang Senate Committee on Finance — bulos kay Sen. Sherwin Gatchalian.
Nahatag ang assignment kay Villar kasunod sang mosyon ni acting Majority Leader Joel Villanueva sa plenaryo sang Senado antes nag-adjourn ang sesyon kahapon.
Ginhatag sa iya ang posisyon apisar sang nangin alegasyon anay ni former public works undersecretary Roberto Bernardo nga nagabaton ini sang kickbacks sa mga proyekto sa budget-making process sang siya pa ang tiglikom sang Department of Public Works and Highways (DPWH).
Kumpyansa naman si Senator Gatchalian sa ikasarang ni Villar bangud sa nauyatan sini nga nanuhay-tuhay nga posisyon sa gobyerno kag bangud man sa mga negosyo sang iya pamilya nga nagahatag sa iya sang masangkad nga ihibalo sa finance.
Si Gatchalian amo ang ika-lima nga senador halin sa minority bloc nga ginkakasan sang committee leadership matapos ang kudeta sang nagligad nga semana.
Sang Lunes, gin-anunsyo man nga ginkuhaan man sang committee chairmanship ang iban nga kaalyado ni former Senate President Tito Sotto nga sanday Senators Risa Hontiveros, Bam Aquino, kag mag-utod nga sanday Erwin kag Raffy Tulfo.
Lakip sa ginahulat nga anunsyo amo ang magapamuno sa gamhanan nga Blue Ribbon Committee nga nabakante naman ni Senator Ping Lacson.
Sandig kay Senate President Alan Peter Cayetano, ginapilian nga ibutang sa pwesto si Senator Rodante Marcoleta ukon si Senator Pia Cayetano.
