Liwat nga na-eleher bilang chairman sang Senate public works committee si Senator Mark Villar matapos siya magbalhin sa majority bloc sang upper chamber.
Ginkumpirma ni Majority Leader Senator Juan Miguel Zubiri ang pagsaylo ni Villar sa mayorya sa plenary session kahapon, Oktubre 8, kun sa diin gin-anunsyo man ang pagbutang kay Villar bilang chairman sang public works committee.
Gin-eleher man ang senador bilang miyembro sang Commission on Appointments (CA).
Bangud sa pagbalhin ni Villar, nagsaka na sa 14 ang mga miyembro sang majority bloc.
Ang utod ni Mark nga si Senator Camille Villar nagpabilin naman sa minority bloc nga ginapangunahan ni Senate Minority Leader Alan Peter Cayetano.
Una na nga nagsipak si Mark Villar sa minority bloc sang naga-deliberate ang impeachment court kaangot sa 16-vote threshold para ma-convict si Vice President Sara Duterte.
Nagboto sadto si Villar pabor sa paghatag sang flexibility sa impeachment court sa pag-interpretar sang probisyon sang Konstitusyon nga nagakinahanglan sang 2/3 tanan nga miyembro sang Senado para sa conviction.
Nahibaluan nga gina-imbestigaran sang Ombudsman ang mag-utod nga Villar bangud sa ginapahayag nga paglapas sa anti-graft law may kaangtanan sa joint ventures sang ila anay water utility firm nga PrimeWater Infrastructure Corporation.
Lakip man sa mga respondent sa criminal kag administrative complaints sanday anay Senators Manny kag Cynthia Villar, businessman nga si Manuel Paolo Villar, kag mga PrimeWater executives nga sanday Fe Reblancos kag Romeo Sabater.
Gin-akusahan ang PrimeWater nga nagsulod sa mga kasugtanan sa mga local water district halin 2015 tubtob 2022 nga ginakabig nga indi pabor sa interes sang gobyerno.
Ang mga kasugtanan nga ginaiimbestigahan ginpirmahan sang panahon nga si Mark Villar amo ang public works secretary kag miyembro sang board sang Local Water Utilities Administration.#
