Nagpasalig si Indonesian President Joko Widodo nga bukaron kag tun-an liwat ang kaso sang overseas Filipino worker (OFW) nga si Mary Jane Veloso nga masobra na isa ka dekada sa presuhan sa Indonesia kag yara man sa death row matapos napasibangdan nga tuyo magpasulod sang iligal nga droga.
Suno kay Presidential Communications Office Secretary Cheloy Garafil, ginhimo ni Widodo ini nga commitment kadungan sang iya pagbisita kay President Ferdinand Marcos Jr. sa Malacañang sang Miyerkules, Enero 10.
Suno naman kay Foreign Affairs spokesperson Ma. Teresita Daza, nagapadayon ang gobyerno sang Pilipinas sa paghatag sang legal, consular, kag welfare assistance kay Veloso nga isa ka domestic helper halin sa Nueva Ecija.
Nagpasalig man ang ahensya nga magapadayon ini sa pag-trabaho kaupod sa Department of Justice (DOJ) kaangot sa kaso nga ginpasaka ni Veloso batok sa mga responsable sa natabo sa iya.
Una na nga ginsiling ni Foreign Affairs Secretary Enrique Manalo nga gin-apelar niya liwat sa Indonesia ang madugay na nga ginahingyo sang Pilipinas nga hatagan sang executive clemency si Veloso.
2010 sang nag-abot si Veloso sa Indonesia sa tuyo nga makapangamo agud makabulig sa iya pamilya kag hatagan sang maayo nga buasdamlag ang iya duha ka bata nga lunsay menor de edad, apang sa pagtapak pa lamang sini sa airport, nakuhaan sang 2.6 kilograms nga heroin ang iya nga luggage nga nagabalor sang ginabanta P28 million.
Gin-sentensyahan si Veloso sang kamatayon paagi sa firing squad apang nahatagan sang last-minute nga kanselasyon ang amo nga sentensya sang Abril 2015 sang ginpahibalo sang gobyerno sang Pilipinas sa Indonesia nga nagsungka ang recruiters ni Veloso.
Kun matandaan, sang Mayo sang nagligad nga tuig, naghingyo man si Marcos kay Widodo kadungan sang Association of Southeast Asian Nations (ASEAN) summit sa Indonesia nga i-reexamine ang kaso sang amo nga Pinay worker bilang “pabor” na lamang sa Pilipinas.
Diri subong sa Pilipinas si Widodo para sa tatlo ka adlaw nga official visit. Siya man ang labing-una nga foreign president nga nagtapak sa Pilipinas subong nga 2024.#
