Nasamaran ang masobra 20 ka tawo kasunod sang sunog sa Ferris wheel sa music festival malapit sa syudad sang Leipzig sa Germany.
Natabo ang insidente sang Sabado sang gab-i (oras sa amo nga lugar) sang una nga nagkalayo ang duha ka mga gondola sa Highfield Festival.
Apat ka tawo ang nagkalapaso, isa ang injured bangud nahulog, kag 18 ang gindala man sa ospital bangud sa smoke inhalation. Sa inisyal nga impormasyon, lakip man sa injured amo ang police personnel kag mga bombero nga nag-responde sa insidente.
Ang Highfield Festival nagalaragway sa ila kaugalingon bilang largest independent rock festival sa Germany kun sa diin linibo ka mga bisita kada summer ang nagakadto sa shores sang man-made Lake Stormthaler sa guwa sang Leipzig.
Lakip sa lineup subong nga tuig amo ang Macklemore, The Kooks, Flogging Molly kag Rise Against.
